നല്ല മക്കൾ

എന്റെ ക്ലാസ്സിൽ ഒരുപാട് കുട്ടികളുണ്ട്. ഒരുപാട് കഴിവുകൾ ഉള്ള കുട്ടികൾ. പല സമയങ്ങളിലും അവരുടെ കഴിവുകളും ചിന്തകളും കണ്ട് അത്ഭുതപ്പെട്ടുപോകാറുണ്ട്. ഒരു ക്ലാസ്സിനെ സംബന്ധിച്ച് പറയുകയാണെങ്കിൽ പല തട്ടുകളായി കുട്ടികൾ ഉണ്ട്. നന്നായി പഠിക്കുന്നവർ, കുറച്ചു പഠിക്കുന്നവർ,പഠനത്തെക്കുറിച്ച് തീരെ ചിന്തിക്കാത്തവർ അങ്ങനെ അങ്ങനെ. എനിക്ക് പലപ്പോഴും ഈ ഉഴപ്പി നടക്കുന്ന കുട്ടികളെ വഴക്ക് പറയേണ്ടതായിട്ട് വരാറുണ്ട്. അപ്പോഴും പഠിക്കുന്ന കുട്ടികൾ നന്നായി പഠിക്കും നല്ല മാർക്കുകൾ വാങ്ങും അധ്യാപകരുടെയും എല്ലാവരുടെയും അഭിനന്ദനങ്ങൾ വാങ്ങും ശെരിക്കും പറഞ്ഞാൽ അവർ ഒരു സ്റ്റാർ ആവും. ആ സമയത്തും ഈ മക്കൾസ് ക്ലാസ്സിൽ കളിച്ചു ചിരിച്ചു നടക്കും. മാർക്ക് കുറയുന്നതൊന്നും അവർക്കൊരു പ്രശ്നമേയല്ല.

അങ്ങനെ അവർ കളിച്ചു ചിരിച്ചു ഉല്ലസിക്കും പക്ഷേ മാർക്ക് വരുമ്പോൾ കുട്ടികളുടെ രക്ഷിതാക്കൾക്ക് അതൊരു പ്രശ്നം ആണ്. അത് രക്ഷിതാക്കളുടെ മത്സരമായി മാറാറുണ്ട് പലപ്പോഴും. 

പലപ്പോഴും നല്ല മാർക്ക് വാങ്ങി പഠിക്കുന്ന കുട്ടി പുറത്ത് വെച്ച് ഒന്ന് കണ്ടാൽ നമ്മളെ ഒന്ന് മൈൻഡ് ചെയ്യണം ന്ന് കൂടി ഇല്ല. എല്ലാവരുടെയും കാര്യമല്ല. എന്നാൽ ക്ലാസ്സിലെ വില്ലന്മാർ ഏത് സ്ഥലത്തു വെച്ച് കണ്ടാലും അടുത്തേക്ക് ഓടി വരും സുഖവിവരങ്ങൾ അന്വേഷിക്കും കൈപിടിച്ച് സംസാരിക്കും ചിരിക്കും. 

ഒരു അദ്ധ്യാപകൻ എന്ന നിലയിൽ പഠിപ്പിച്ചു വിട്ട കുട്ടികൾ നമ്മുടെ അടുത്ത് വന്നു ഒന്ന് ചിരിച്ചു സംസാരിക്കുന്നതാണ് ഏറ്റവും വലിയ ഭാഗ്യം.